اشعــار مقتطفة من قهوة وشيكولاتة -ديوان لعمر طاهر ..

الخريــــطة:-
________

3 سنين والرابعة ..

اكيد الرابعة كبيسة

جنب الشغل عمارة

ورا العمارة كنيسة ..

وانا قاعد مش مرتاح ..

انا باب ديّته مفتــاح ..

كان نفسي اكون سفاح ..

بس ماجبتش مجموع

وانا كل مابامشي ..

بالاقي يافطة ممنوع الوقوف ..

تحت البيت كوافير ..

قصاده محل هدوم ..

صاحبه دايما ملخوم ..

قلبه صالة بلياردو ..

وغرس نخلة قدامه

النخل بيحضن ارضه

كل ماتطول ايامه ..

ازاي الخوف وصلني لدرجة اني مخافش ..

ياللي فرقتوا الحب ..انا قلبي بجد ماخدش ..

ولا يمكن اكون شحات ..

اصل كرامتي بتوجعني ..

وانا كل ماقول التوبة ..

مالقاش راجل يمنعني ..

اكتوبر 2007

======>>

خطوة :-
_____

عمال اقع واقوم ..

انفض ف الهدوم

وامشي خطوة كمان ..

القي الطريق يبان

مش زي ماكان زمان ..

بالعكس اسهل كتير

يناير 2007

======>>

زي مابقولك :-
________

قورتِك ..

ينفع يتدق بيها مسمار ف الحيطة

وشفايفك من النوع اللي لازم يتباس في الشارع قدام الناس ..

جرح فوق حاجبك ..بيلمس القلب بسرعة

وتوترك اكتر حاجة مصدقها فيكي .

بتكرهي الوظيفة ..

وماتعرفيش حماقى ..

بتدخني زي ست عجوزة ..

وشكلك زي اللي سكرانه طول الوقت

بتواجهي العالم بخجل

بس بتفتحي باب التاكسي بمنتهي الثقة ..

وعمر المزيكا ماسكتت في راسك ..

مُزعِجة ..

بتبني اسطورتك كأنثي في صمت ..

وبتنغزيني بابتسامه ..

كل مااقرف افك شفرة حزنك المألوف ..

كنت فاكرك مجنونة

دلوقت ماعرفش ليه بقيت متأكد ..

ديسمبر 2006

=======>>

SMS
___


موبايلك مقفول ..

زمان الرسالة اللي بعتهالك

متعلقة في الهوا

مستنياكي لحد ماتصحي من النوم ..

وتمدي ايدك تفتحي الموبيل علشان تعرفي الوقت ..

زمان رسالتي متعلقة في الهوا ..

جنب رسايل كتير ..

رايحة لناس بيحتاجوا دايما لوقت علشان الرسايل توصل

شحنة ساكنة

محتاجة تتفرغ ..

علشان تبتدي الارض تدور ..

فبراير 2007

=======>>

شيكولاتة :-
____

يخلق من الشبه اربعين ..

انا واحد واربعين ..

ساكن في شارع 41

ومؤمن ان الحاجات

بتبقي حاجات تانية في الواحد والاربعين

النبي بقي نبي في الواحد والاربعين

اول قصايد جوتة في الواحد واربعين

وعندي عم شهيد ..

مات علي ضفه ابعد

في معركة بالرصاص ..

في طريق السويس الكيلو 41

اعرف 41 ترجمة لكلمة خيانة ..

وعلشان ابقا مطلق ااتجوزت واحد واربعين يوم

البني آدم بيتحول لمدمن بعد 41 سيجارة حشيش ..

والدم بينضف من المخدرات في اليوم 41

جزمتي مقاسها 41

نسبة الكحول ف الفودكا 41

وبعد 41 كاس

ببقي قادر اعد حروف اسمي

بابقي قادر اعمل جزمتي مخدة وانام في اي مكان

علشان كدة البنج مبيأثرش فيا ..

والجرح اللي ف بطني خد 41 غرزة

وفاكر كويس ان كل غرزة اخدت 41 ثانية


والوحيدة اللي حبيتها من عشر سنين ..

لما سألتها عن سنها كان واحد وتلاتين ..

اكيد ف اللحظة دي ..

قاعده علي البحر في دبي

بتحتفل بالـ41

الساعة 12 و41

والاوضة بتتحرك بيا من علي خط 41

وانا حاسس بالسعادة ..

لاني غير الـ40 اللي ربنا خلقهم شبه بعض ..

ولاني اول واحد

في الـ40 واحد اللي جايين

يوليو 2006

=====>>

قابلني 9
____

انا سر واضح للاسرار

انا شمس اضعف من فنار

انا نقطة حاضنة رخام البار

دي حادثة قتل واللا انتحار


قميص انا وناقص زرار

انا جمب منك لكن سيبني

وقابلني 9 الليل ستار

الناس بتجمد لما تبني ..

انا اللي بجمد لما انهار

كاسك ياصاحبي بيلمع ليه ؟

دة دمي واللا بتشرب ايه ..؟

اسمع سؤالي وانسي قوام

ومتجاوبش دة بس كلام

باحب علامات الاستفهام

والرد عمري ماباحلم بيه

سؤالي جنة والرد نار

انا قهوة سخنة ع الفطار

انا تاكسي قدام المطار

انا ليل انا بقعة قمر ..

وستارة تتحدي النهار

انا المذيع

وانا الاخبار ..انا 1000 حاجة

وانتا اختار ..

نوفمبر 2006