احساسنا بالزمن عامل ازاي !؟
ازاي حاسين بالثواني والدقايق والساعات والايام ..والشهور .. والسنين ..
ساعات كتير ببقا عايز الوقت يمر .. والدقيقتين الباقيين .. بحس انهم سنتين ..
وساعات كتير .. مبحسش بالوقت ..
ابقا خارج وماشي ف وسط البلد .. واظبط لنفسي مدة ساعة واحدة ..
واستغرب لما الاقي مر ساعتين وأكتر ..
طب ايه اللي بيتحكم في الزمن ..أو الاحساس بالزمن ..
ممكن يكون الانسان نفسه ..؟
احساسه ساعتها عامل ازاي ..
والا البيئة المحيطة ..!؟
والا الصُحبة اللي معاك .. ؟
يعني لو واحد مبسوط .. وماشي ف الصحرا .. لوحده ..
ممكن يبقي حاسس بإيه ..
احساسه بالوقت هيبقي عامل ازاي ..
طب لو دة شخص مخنوق .. وكل شوية بيبص في الساعة ...
وماشي في مكان كلو خضرة وجناين .. ومعاه اصحابه الانتيم ..
ومع ذلك .. حاسس بان عقارب الساعة متآمرة عليه .. و ان الوقت نفسه وقف ..
المشهدين فيهم حاجة شاذة .. صح !؟
طب لو بدلنا الشخصيات ..
وجبنا المخنوق دة في الصحرا .. والمبسوط دة في الخضرة والجنانين ..
المخنوق دة لما يمشي في الصحرا ..
مش هيحس بالوقت اصلا .. لانه هينشغل ف الصحرا اللي وقع فيها ..
بالعكس .. هتزداد خنقته ..
طب والمبسوط ..
دة بقا الراجل المناسب في الوقت والمكان المناسب ..
دة بين صحابه .. وخضرة .. ومبسوط .. هينبسط اكتر ..
يعني الرابط بين المشهدين ..
هو الاحساس النفسي ..
معني كدا .. ان اللي بيتحكم في احساسك بالوقت ..
هو احساسك انك عشته كما ينبغي ..
الفرق ف احساسك انت ..
ومسألة البيئة المحيطة .. والصحبة .. كماليات ..
حاجات من الدرجة التانية ..
مانا ممكن ابقا لوحدي .. وفي الصحرا .. ف نفس الوقت مبسوط واخر حلاوة ..
وممكن ابقا مخنوق .. ومكتئب ... وبرغم دة انا معايا صحابي و قاعد ع البحر ..
ودة كلو ميأثرش فيا ..
ويتقل احساسي بالوقت ..
طب الوقت سيف ..
و
If u would cut it , it will cut you
ازاي نبقي مبسوطين وفي نفس الوقت نحس بالوقت ..
نبقي مقدرين الوقت فعلا .. وف نفس الوقت .. مبسوطين بأننا نقضيه فعلا ..
مش عايزينه يمر كدا وخلاص .. وعايزين نعيشه صح.. ونفرح بيه ..
اكيد لازم هييجي لحظة وهنزعل ..
اكيد هييجي وقت ونحس باليأس ..
نحس بالخمول والكسل ..
لكن ازاي نخلي الوقت له قيمة كبيرة اوي .. و بردو نعيشه بكل تفاؤل وحب للحياة
سؤال صعب .. ومحير اوي ..
انا عن نفسي مش قادر لحد دلوقت اوصل لاجابة شافيه ..
بس غالبا انا معنديش غير شبه حل ..
وهو ان الواحد يعيش حياته .. بالنظام .. ومفيش مانع لما يخرق النظام الي واضعه لحياته ..
مرة كدا .. او مرتين .. او تلاتة ..
المهم ان دة ميعطلوش عن مهمته وعن حياته ..
كمان .. لما يشغل وقته .. يعني ميبقاش فيه دقيقة في اليوم يضيعها ف الهوا ..
انا مش بقول يبقي رخم ومتزمت .. بس مفيش مانع لما يكون الواحد شغال في مكتبه .. وبيسمع فيروز ..
او قاعد بين المحاضرات .. بيقرا كتاب .. او بيسمع فيروز بردو :D
لكن في نفس الوقت .. بينجز وقته صح ... وبينفذ كل المهام اللي عليه ..
وميكتمش شعوره ..
ساعة الفرح .. يفرح ويهيص ويرقص ..
وساعة الحزن .. يدمع .. ويزعق ..
لان الحياة عمرها ما كانت قفش ..
اذا كان طريقك للنجاح .. مفروش بالورود والازهار ..
ليه تقلع الزهور .. وتدوس برجليك علي الورود .. وتنشّفها علي نفسك .. !!
يبقي خير الامور الوسط .. نظام جميل ينظملك وقتك وحياتك .. وتعيش بردو مبسوط ..
جايز تكون هي دي السعادة في الوقت ..
والا ايه ؟!
