طــــــريقة جديدة للتــأمــل

أوقات كتير ..

بيبقي عندي رغبة كبيرة في الكتابة .. اكتب بأي طريقة ..

عامية .. فصحي .. انجلو ارابيك ... اي حاجة ..

بس اعبر عن حاجة شغلاني و بفكر فيها ..

الاجمل ان الرغبة دي ... بتيجي دايما .. الصبح بدري

وبتزيد .. لما امشي في الشوارع .. وهي خالية من اي حد ..

والهوا نقي .. كأنه هوا مُشبّع بالطاقة والحيوية ..

الطبيعة .. كمان .. بتبقي في ازهي صورها ..

بتسبح بالرحمن ..



علماء واطباء نفسيين كتير قالو ان البيئة المحيطة هي اللي بتأثر في اخلاق وشخصية الانسان ..

لكن محدش قال انها كمان .. بتأثر علي تأمله في الطبيعة .. و اثارة روح المتأمل جواه ..

فعلا .. اوقات كتير .. بحس كدا ..

بحس ان الساعة 6 الصبح .. انسب وقت .. للتفكير والتأمل ..

باحس بأفكار غريبة .. عمري ماكنت فكرت فيها لحظة .. ولا خطرت علي بالي ..

وممكن من الفكرة البسيطة .. اوصل بالتسلسل لفكرة عميقة اوي ..


والاحلي انها بتطلب انها تتسجل علي الورق ..


ياريت اليوم كلو كدا ..


ياريت اليوم يبقي نقي .. وخالي من الناس .. والساعة 6 الصبح بردو ..وشوارع فاضية ..


يدينا فرصة ع الاقل .. نفكر بهدوء وبساطة .. ف بكرة .. وامبارح .. والنهاردة ..



نفكر في السبب الكبير لوجودنا ..

نفهم الاحداث بتمشي ازاي .. وعلي اي منطق .. ع اي اساس ..

انا كتبت كل دة بالعامية .. ومش عارف ليه .. رغم اني متعود اكتب فصحي بشكل متزمت ..



لكن الاسلوب دة ريحني اوي .. وخلاني اقدر اقرب للحقيقة ..