2009 <---- 2010

عجيب اوي امر الانسان ..


بيستقبل السنة الجديدة بتفاؤل وحب وسعادة .. ويقول يارب تبقي سنة سعيدة ..

وفي اخر السنة .. بيبقي مش طايقها وحاسس بيها تقيلة .. مش عايزة تمشي ..

مع ان السنة .. زي ما كان فيها وحش .. كان فيها الحلو .. و زي ما كان فيها الحزن .. كان فيها السعادة ..

زي ما كرهنا فيها حاجات كتير .. حبينا حاجات تانية كتير ..

انا مش هقول ل 2009 كلمة تضايقها .. ولا هنافقها .. هقولها شكرا ..

قضيت معاكي ايام جميلة .. وقضيتي معايا ايام حزينة .. وشاركنا بعض حاجات كتير ..

صحيح اللي حلمته .. محققتوش .. وصحيح اللي اتمنيته يجيني .. مجاش ..

لكن .. ربنا بيعوض كل عبد من عباده .. بحاجة .. ومبيسيبوش يبات حزين ..

وزي ما السنة نكدت عليا ايام .. ونيمتني زعلان .. فرحتني ف ايام تانية .. وادتني حاجات جميلة ..

ايام كتير .. كنت محتاج الفرحة .. ولما جتني .. ساعات مكنتش بحسها .. وكنت بحس بحاجة ناقصة ..

العيب فيا .. يا 2009 .. مش فيكي ..

انا اللي معرفتش افرح ..


ولما بفتكر اني محققتش حاجة من اهدافي فيكي .. بفتكر اني اصلا محددتش انا عايز ايه ف 2009


ومحددتش .. ايه اللي اقدر اعمله .. ولا حددت طريقي ..

يبقي العيب فيا .. مش فيكي يا 2009 ..

انا مش زعلان منك .. بالعكس بتمني انك متكونيش زعلانة مني ..

وانك ع الاقل تقبلي مني وردة وكلمة شكر ..

وأوعدك .. اني مع 2010 .. هعوض اللي فاتني معاكي .. متغيريش بقا منها .. دي زي اختك :P

انا عارف انك بتحبيلي الخير .. و عارف انك عايزة تقولي الدنيا يوم ليك ويوم عليك .. متقوليش حاجة

انا عارف دة كويس ...

احنا ضحكنا كتير سوا .. وبكينا كتير سوا .. ان الاوان كل واحد يشوف حاله .. ويتمني للتاني الخير ..

انا عن نفسي .. هفضل شايل ذكراكي جوايا .. بس انتي ياريت توصي عليا 2010 .. وتخليها حنينه عليا ..

ايه .. بتبصيلي كدا ليه ..!

متقوليش ان كلامي متناقض .. انا عارف ان سعادتي ف ايدي .. واحلامي ف ايدي احققها بردو ..

وانا اللي مخططتش معاكي .. وعشان كدا محققتش حاجة منها ..

بس اوعدك .. هخطط مع 2010 .. واحدد عايز ايه .. بس وحياتك .. وحياة اختك الكبيرة 2008 ..


خلي 2010 تبقي حنينة شوية .. وتساعدني ع الاقل ..



الله ..!

بردو بتبصي نظرة غيرة .. الواحد ميعرفش يهزر معاكي ولا ايه :P

خلاص .. فاضل اقل من 24 ساعة اهو ..


خلاص ..!؟

جاهزة ..؟!


هتوحشيني يا بنت الايه .. روحي بقا ف التوك توك دة ..

انا هروح استقبل 2010 ف المطار .. :P


خلاص بهزر بهزر ..:D



2009 ... شكرا بجد علي كل لحظة جميلة فاتت ..



- -

2010 ..


مش هتيجي بقا ؟ ;) ;)